蕃茄洋蔥三文魚湯

今日行jusco 本來無想過買三文魚的, 見到d三文魚頭魚尾魚骨等下欄嘢, 好平呀,

就買番屋企煲湯就最啱喇, 其實成條三文魚都好有營養的, 最好個d就用咗嚟做魚生,

咁餘下個d咪可以用嚟煮餸/煲湯啦! 我今日煲邊個"蕃茄洋蔥三文魚湯",

真係最啱一家大細飲呢 。

材料: 三文魚 (約$8-15) + 洋蔥 (半個) + 蕃茄 (3個) + 蒜頭 (3粒) + 白酒 (2湯匙)

做法:

1) 先煲滾水, 約 900 ml份量

2) 水未滾時, 將洋蔥切絲, 蕃茄切細, 蒜頭去衣 (全部備用)

3) 水滾後, 將蒜頭及洋蔥先放入煲內,

4) 再滾起時放入三文魚,

5) 見到煲內的水成奶白色時, 再放入蕃茄一起用中火煲30分鐘, (期間如水少,可加入滾水至原先位置)

6) 之後倒入白酒, 再煲多 15分鐘, 即可飲用。

小心得:

今次我用的是近三文魚腩位置, 鍾意無咩骨, 我之前煲呢個湯係用三文魚頭/魚尾等其它位置,

不過就多骨d, 但味道都係一樣的。

其實之前我煲呢個湯係無落白酒的, 不過我蝦子餅話飲時覺得腥, 所以我加咗白酒去煲, 就無咗腥味,

其實煲完已經無晒d酒味的, 怕小朋友飲唔係咁好的話, 你可以唔落。

p.s. 我所用的外國白酒, 千祈唔好用中國個d燒酒/白酒呀! 唔好用錯。

食譜改編自: I-Cable 肥媽私房菜